Nakasanggir Dagiti Natulnog

Nakasanggir Dagiti Natulnog

Nagrupsa nasasam-it a balikas
Limmangto managado a nabikas
Duray no awan pay nailippas
Ipasindayag dagiti ima a rapas

Awan pulos iti isusupiat
Agindadalus ken aginsasayaat
Kas ulmog sumipsip kina maag
Mailungalong ubbaw a pasindayag

Sadino iti naturong napasnek a sapata
Sikayo ti bosko iti katnoman ken ita
Dimmakkel ulo naam-amlingan,insigida
Naglimmes bileg,kari ket naiwawa

Kas tay nalungugan nga agballa
Paspasurot, mapusipos uloda
Agkurno, agtamed nga awan dudua
Pader a sanggir iti kalasagda

Natulnog nakatugaw nga agkakaburik
Agkakaalaanda iti pitik, sakuntip
Dusag dida ikankano inda lumiklik
Naigumonda iti trono kas adik

Iti tao, saanen a kas idi ugma
Ipettengda nalinteg a dana
Maungpotto latta iti pagpatinggaanna
Umayoyang bumanakabak a karma

Malukaisan nalidem  nga ilemlemmeng
Madalusan ti dalan, maikkat iti tubeng
Iti baro a namnama ket dumteng
Malawagan panunot dagiti aginmumuneng! https://www.youtube.com/channel/UCJtQ-uUbwUp1bSmkc-dhmWA