No Adda Rigat Adda Nam-ay

No Adda Rigat, Adda Nam-ay

Riniwriw a pirak
Bugas panagsalukag
Tuok, naglunit rimat
Tayok nam-ay nasukainak

Agngangabit, linemmes ni liday
Mangbuak yaay kinakurapay
Mamagungar namnamak a natay
Ngarab derraas innak tinalaytay

Naridam umay nga agsapa
Nangisekkad kaniak namnama
Nairot pannakasiglot pamilia
Isasangbay nabun-as a Paskua

Adda man karasaen ni ranggas
Mawaknitan nasasam-it nga arasaas
Dagiti nasintir a mata  mapunas
Ragsak barukong kumarab-as

Nalabon, wenno saan ti dasar
Ayat, pammateg agungar
Aglaplapusanan a rag-o rummuar
Kaunggan maysa ken maysa maisibar!

Mario "yong" Dela Cruz