Sanut Iti Lagip

Sanut Iti Lagip

Nalaka a baliksen,narigat nga adawen
Umukuok latta bayat panaglabas panawen
Pilpilitek a laksiden,ngem umayoyang metten
Iti apges ken liday sanko maiturayanen

Umay latta mangaliaw iti rabii ken aldaw
Adu nga istoria ngem pasig met a pasaw
Iti gasat a nalak-am innak pay ngata malayaw
Bayat panangbuyak matnag a bullalayaw

Ala iti pagteng nga inka inparikna
Inamirisko amin ket naripiripko dagita
Isu met la gayam nga agin -uungetka
Ta dim kayat a makitak ta panagsagaba

Iti luksawko iti kallabes ket nasebseban
Ta sika ket diak metten malapdan nga agpakadan
Ti ammok,insukatnak ket innakon tinalikudan
Ngem adda metten gayam sagubanitmo a saanen maagasan

Nalpay 'toy abaga,naglua 'toy mata
Inriawko iti sangalubongan no ania man ti pannosa
Pumanawakon,kakaasikan ket agsingsingpetka koma
Dagita iti naudi a nangegko a balikasna

Marsuod man barukongko kadayta a kanito
Nagbalin nga ampaw datoy panunotko
Diak masirmata no kasano pay agsagibo
Iti nalpasen a nageppas a ragsakko

Ita simmangbay manen aldaw dagiti puso
Sanut iti lagip katnoka a mailaksidko
Tapno makarukatak met iti ladingit a napalalo
Ket sumingising manen raray 'toy biagko.

Mario "Yong" Dela Cruz
Cabarroguis Quirino