Taaw A Nagbaetan

Taaw A Nagbaetan

Adayokaman biagko
Dinto agbaliw pitik toy puso
Sikanto latta inggana tanemko
Duray itan mauyos man angesko

Urayenka ingganat inggana
Ta mailiwakon kenka
Kasla pay agmauyongen itsura
Ta ladawanmo laingen innak kasarsarita

Kayatko a langoyen ti taaw
Tapno iti ayanmo innak makadap-aw
Panagayatko dinto pulos bumaaw
Toy panunotko agbalin man a kawaw

Rangtayko lattan dagiti samiweng
Kaslaak manla adda dita dennam no umaw-aweng
Nga innak ar-arakupen ken saksakloten
Kas maladaga nga innak in-indayonen

Taaw a nagbaetanta
Saan a tubeng ayan-ayatta
Ipaanod ta iti alon dagiti riknata
Ket maep-ep no agsapliak iti daga

Wen,adayo a disso iti ayanmo
An-anosam tapno panagtipon ta ket nagarbo
Ta kunam diakton igganan ti suyod ken arado
Makaruk-at ta iti rigat a napalalo

Ngem bayat panagdingegko
Kanta ni madam Noraline Domingo
Ken ni ser Vhen Bautista nga inidulo
Sumken metten iliwko a napalalo

Agarubos man toy lua
Diak pay ketdin ammo iti laud ken daya
Gapo iti nakana nga iliwko kenka
Ngem diakto pulos mauma
A manguray kenka patpatgek a saniata